Indi magpangayo sang pasaylo si Ukrainian President Volodymyr Zelensky kay US President Donald Trump kay Vice President JD Vance matapos ang ila pagbaisay sa White House.
Suno kay Zelensky, gina-respeto niya ang presidente kag ang mga pumuluyo sang Amerika kag nagapati siya nga wala man siya sang ginhimo nga malain.
Pahayag ni Zelensky, mas maayo kuntani ang dalagan sang diskusyunay kun wala sang mga camera kag katapo sang media sa ila atubang.
Suno pa sa iya, pareho nga indi maayo sa US kag Ukraine ang natabo.
Nagapati naman ini nga masalbar pa ang ila relasyon ni Trump.
Nahibaluan nga sa amo nga meeting, ginhangkat ni Zelenskiy si Trump bangud sa paghumok sini kay Russian President Vladimir Putin.
Ginbatuan man ni Zelensky ang claims ni Trump nga napudpod na ang mga syudad sa Ukraine sa sulod sang tatlo ka tuig nga gyera, apang nagsiling naman si Trump nga gusto na ni Putin nga maghimo sang kasugtanan.
Gina-insister ni Trump nga dapat mangin mas mapinasalamaton si Zelenskiy, kag ginsilingan man niya ini nga naga-gamble sa World War III bisan pa nga nagakawad-an na ini sang mga soldado.
Nagasal-ot man si Vice President Vance kag nagsiling nga wala sang pagtahod si Zelensky bangud nagkadto ini sa White House agud lamang nga iinsister ang iya nga posisyon.
Ginapilit naman ni Trump nga mahimo magsulod sa deal ang Ukraine, bangud kun indi, indi na magsuporta ang US.
Ini nga meeting ang natabo antes kuntani ang pagpirma sang duha ka lider sa natural resources agreement.
Ginpahayag nga wala ini nadayon, nagbiya si Zelensky sa White House, kag nakanselar man ang naka-schedule kuntani nga news conference.
