Sa labing una nga kahigayunan, wala sang may na rekord ang Department of Health (DOH) nga napatay sa Coronavirus Disease (COVID-19) as of July 9 sa Pilipinas.
Nagapabilin sa 1,314 ang numero sang mga napatay, samtang ang recoveries ang nagalab-ot sa 12,813 sa diin nadugangan ini sang 225 ka mga pasyente nga nag-ayo sa nasambit nga balatian.
Apang ang kaso sang COVID-19 sa Pilipinas ang padayon nga nagataas kag subong yara na sa 51,754 ang infected matapos madugangan sang 1,395.
Ini ang labing una nga kahigayunan humalin sang Marso nga wala sang may na rekord nga napatay bangud sa COVID-19.
Suno kay Department of Health Undersecretary Maria Rosario Vergire, nagaka-eksperyensya ang Pilipinas sang pagtaas sa numero sang mga kaso bangud sa community transmission.
Sa pihak nga bahin, nagdangat naman sa 12,239,516 ang kaso sang COVID-19 sa bilog nga kalibutan, 553,694 ang patay samtang 7,115,372 ang naka-recover.
