ILOILO CITY – Wala sang may na-record nga insidente ang Iloilo City Police Office kadungan sang pagpatigayon sang Opening Salvo sang Dinagyang Festival.
Sa interview sang Bombo Radyo kay Police Lieutenant Colonel Rene Obregon, Jr., deputy city director for operations, iya ginpahayag nga magluwas sa bata nga nagpangita sa iya ginikanan, wala sang may na-record nga insidente nga mahimo ma-angut sa Opening Salvo.
Bangud sini, mas maayo suno kay Obregon nga butangan sang name tag ang mga bata agud nga mahapos ang pagpangita sang ginikanan ukon guardian.
Sa amo nga aktibidad kahapon, ginabanta nga nagdangat sa P15, 000 tanan ang tawo nga naglantaw.
Ini ang ginlauman na sang kapulisan bangud sa kahidlaw sang tawo nga liwat nga magsaksi sang Dinagyang Festival matapos ang duha ka tuig nga pandemya.
Suno pa kay Obregon, may pila lamang sila ka adjustment nga himuon sa deployment kaangay na lamang sang crowd control kag traffic management.
Nagpanawagan man si Obregon sa publiko nga padayon lang ang pagsunod sa mga pagsulundan nga ginpatuman sang kapulisan agud nga ma-ekperyensyahan ang malinong kag masadya nga Dinagyang Festival.
