Iloilo City – Wala sang may narekord ang Iloilo City Task Force on Morals and Values Formation nga mga kaso sang menor de edad nga nagpadulong sa mga lodges kag inns kadungan sang Valentine’s Day.
Sa interview sang Bombo Radyo kay Nestor Canong, pinuno sang amo nga taskforce, iya ginpahayag nga ilisipon ang mga menor nga nagpadulong sa nasambit nga establisyemento apang wala ang mga ini ginbaton.
Tuman ang pagpasalamat sang natungdan sa management sang mga establisyemento bangud sa pagkooperar nga siguraduhon nga wala sang mga menor nga makatapak sa mga lugar nga ini.
Ini matapos nga nakasaad sa Regulation Ordinance No. 2015-447 sang Iloilo City ang pagdumili sa pagbaton sang mga menor de edad sa mga motels, lodging houses, inns, pension houses, kag resorts.
Suno pa kay Canong, maiwat sa aga kag udto ang mga lodges bangud mas ginpili sang mga customers nga magpadulong sa kagab-ihon.
