ILOILO CITY – Ginpaidalom sa surgical lockdown ang Zone 2 sang Brgy. Rizal Lapuz Sur, Iloilo City matapos nga nagsaka sa walo ang COVID-19 cases sa nasambit nga lugar.
Sa interview sang Bombo Radyo kay Punong Barangay Wilson Allona, iya ginpahayag nga duha ka panibag-o nga kaso sang COVID-19 ang na record nga ginabug-usan sang mag-utod.
Suno kay Allona, una nga nagpositibo sa COVID-19 ang isa ka pasyente nga gin-admit sa hospital kag nalatnan man ang utod nga amo ang nagabantay.
Ginpahayag ni Allona nga ang isa pa gid ka utod sang duha ang nakabatyag man sang paglain sang pamatyag rason nga ginpanugyanan ini sang doktor nga magpakuha sang swab sample.
Sa subong, 33 na ka indibidwal ang ginkuhaan sang swab sample kag ginahulat na lang ang resulta sang COVID-19 test.
