Nagpositibo sa drug test ang duha ka taxi drivers sa ginpatigayon nga Oplan Harabas sang Land Transportation Office (LTO) 6 kag Philippine Drug Enforcement Agency (PDEA) 6 sa Dumangas Port kahapon nga adlaw, Miyerkules, Abril, 1.
Ini ang nagdugang sa walo ka drivers nga una na nga nagpositibo sa drug test sa mga terminals nga una na nga ginbisita sang PDEA kag LTO kun sa diin, lima diri ang tricycle drivers, duha ang taxi drivers kag isa ka driver sang Public Utility Jeepney kag ini sila ang napaidalom na sa confimatory test.
Sa interview sang Bombo Radyo kay Atty. Gaudioso Geduspan II, Regional Director sang LTO 6, iya ginpahayag nga humalin sang Lunes Santo, Marso 30, 2026 may ara na sang 1,422 ka mga specimen ang ginpaidalom sa drug test halin sa mga terminals sa probinsya sang Antique, Sara, Roxas, kag Guimaras.
Ini nga numero ang naglapaw na sa target sang opisina apang magapadayon pa bangud may mga alkalde nga naga-request sa ila opisina nga magpatigayon sang drug test sa mga drivers.
Nagapangabay man ang opisina sang Land Transportation Region 6 sa Association of Taxi Operators in Panay nga dapat nga maghimo sila sang nagakigo nga tikang batok sa illegal nga paggamit sang droga para sa ila mga drivers agud nga matapna na ini.
