Nagdangat sa 100 ka Sangguiniang Kabataan (SK) officials sa pungsod ang nagpaguwa sang pahayag nga nagapamatok sa Public Utility Vehicle (PUV) Modernization Program.
Kaundan ini sang unity statement nga ginpaguwa sang SK officials kasunod sang paglampas na sang Disyembre 31 nga deadline para sa consolidation sang individual nga franchise holders sang public utility vehicles.
Suno sa amo nga unity statement nga may mga pirma sang nag-ugyon nga SK members, nagatindog sila bilang kadampig sang 200,000 ka jeepney drivers kag operators nga naapektuhan ang palangabuhian bangud sa ginpatuman nga franchise consolidation.
Nagpanawagan man ini sa mas madamo nga mga kabataan nga mag-upod sa ila nga suportahan ang kawsa sang mga jeepney drivers kag operators.
“We call upon the Filipino youth to rally behind this cause, to amplify our collective voice, and to advocate for the preservation of the livelihoods and rights of our jeepney drivers and operators,” kabahin sang statement.
Gin-mensyonar man sang SK officials nga posible matabo sa mga commuters ang krisis sa transportasyon bangud sa deadline nga ginhatag sang gobyerno.
Nag-apelar man ang mga opisyal kay President “Bongbong” Marcos Jr. nga i-evaluate sa liwat ang mga pagsulundan.
“We earnestly appeal to the President to either set aside or completely revoke the franchise consolidation deadline,” kasugpon sang pahayag.
As of January 1, ginpahayag sang Department of Transportation nga 70% pa lamang sang PUVs nationwide ang naka-comply sa consolidation deadline.#
