Nagkinarankaran ang linibo ka mga pumuluyo sa bug-os nga isla sang Cebu matapos nga gin-igo sang mabaskog nga 6.9 magnitude nga linog kagab-i, alas 9:59 sang Martes, Setyembre 30.
Isa sa mga halitan amo ang Archdiocesan Shrine of Santa Rosa de Lima sa Daanbantayan, Cebu, nga naguba ang pila ka parte sang istraktura sang simbahan bangud sa mabaskog sang linog.
Sa Bogo City, nga amo ang epicenter sang linog, isa ka kilala nga fast food chain ang naguba ang estruktura kag gin-deklarar nga delikado sudlan.
Sa Cebu City, temporaryo nga naggwa sa guwa sang ospital ang mga pasyente kag medical staff sang Cebu City Medical Center bangud sa kakulba sang linog.
Tatlo ang kumpirmado nga nasamaran sa nasambit nga insidente.
Ginpahayag ni Cebu City Mayor Nestor Archival ang iya panawagan sa publiko nga magpabilin nga kalmado, samtang ginahulat ang posible nga mga aftershocks.
Suno kay Joel Erestain, Regional Director sang Office of the Civil Defense – Region 7, ginpahayag sini nga ang Nothernnga bahin sang Cebu ang pinaka-naapektuhan sang linog. Ginkumpirmar man niya nga ginpasaka ang magnitude sang linog halin sa 6.5 pakadtu sa 6.9 base sa pinakaulihi nga datos.
Sa pinakaulihi nga report sang Cebu Capitol PIO kaina nga alas 2:00 sang kaagahon, Oktubre 1, nakumpirmar nga 13 ka tawo ang napatay, siyam ka tigulang kag apat ka kabataan sa Bogo City, samtang apat man ang napatay sa San Remegio.
Nagapadayon pa ang search and rescue operations sang mga otoridad sa mga lugar nga naapektuhan.
Bangud sini, pila sa mga eskwelahan sa Cebu City, Mandaue, kag iban pa nga lugar ang nagdeklara sang wala klase subong nga adlaw, Oktubre 1.
