WARNING SENSITIVE CONTENT:
Patay ang isa ka 15 anyos nga solterito kadungan sang ginpatiigayon nga opening lights sa Dueñas Iloilo kagab-i Disyembre 12, matapos ginpa-arakan kag ginbuno ini sang 13 ka beses.
Sa interview sang Bombo Radyo kay PLT. Floripis Subere, Deputy Chief of Police sang Dueñas Iloilo, iya ginpahayag nga papauli na kuntani ang biktima upod ang iya mga kaupdanan sakay sa motorsiklo sang ginsundan sila sang grupo sang mga suspek.
Pag-abot sa Barangay Capuling, Dueñas, Iloilo, nagpundo ang grupo sang biktima agud magpangihi sang gulpi na lamang nakabati ang grupo sang paglinagapok.
Gilayon naman nga nagdinalagan ang mga kaupdanan sang biktima kag ang 15 anyos nga biktima ang nagdiretso sa talamnan, samtang naglubong ang iya tiil, gani naabtan siya sang mga suspek kag ginbuno patay.
Ginapatihan nga may daan na nga hiligut-anon ang duha ka grupo rason nga tuman ang kaakig sini sa biktima.
Ginhingagaw pa kuntani nga dal-on sang mga residente ang biktima padulong sa ospital, apang gindeklara ini nga dead on arrival.
Gilayon naman nga nagpatigayon sang hot pursuit operation ang kapulisan nga nagresulta sa pagkilala kag pag-aresto sa isa ka suspek nga ginkilala kay alyas “Tam-tam,”samtang ang duha pa gid ka suspek ang padayon nga ginapangita sang otoridad.
Samtang sa interview naman sang Bombo Radyo sa suspek nga si ”Alyas Tam-tam”, iya ginpahayag nga madugay na sini nga ginadumtan ang grupo sang biktima bangud nakaagi ini gintampuyong sang grupo sang biktima nga ginhalin sang iya kaugot sa mga ini.
Suno sa suspek indi man ini kuntani mangbuno apang gin-garit garit sang grupo sang biktima rason nga naimpito gid ini.
Dugang pa sang suspek nga naghinulsol man ini kuntani apang wala na ini sang mahimo bangud napatay na sini ang biktima.
