Masobra 150 na ka mga boardinghouses sa syudad sang Iloilo ang natukiban nga naga-operate subong nga tuig nga wala sang business permit.
Sa latest data sang Iloilo City Boardinghouse Commission, sa tuig 2023, yara na sa 442 na ka mga boardinghouses ang na-check kag sa sini nga numero, 154 ang wala sang business permit halin sa Iloilo City Government.
Sa interview sang Bombo Radyo kay Teddy Tingson, head sang opisina, iya ginpahayag nga kun wala sang permit, naga-isyu sila sang notice tubtub sa third and final notice.
Kun wala sang compliance, mahimo na ini nga i-rekomendar agud ipasirado.
Gin-athag sini nga lakip man sa gina-check sang opisina amo ang proper waster disposal kag ang sanitation nga mahimo man basehan sa closure sang boardinghouse.
Magluwas sa boardinghouses, naga-check man ang Iloilo City Boardinghouse Commission sa inns, hotels, lodging houses, kag house-for-rents.
Sa tagsa ka inspeksyon, may ginabutang sa remarks sang mga personnel kag ipasa ini sa Business Permit and Licensing Office. ##
