Dako ang pagpati sang Tubungan Municipal Police Station nga kakilala kag pamilya ang possible suspek sa naghimulos-patay sa 18-anyos nga dalaga sa Brgy. Ingay, Tubungan, Iloilo.
Sa interview sang Bombo Radyo kay Police Captain Alberto Mangilimotan Jr., hepe sang Tubungan MPS, iya ginpahayag nga ipaidalom na sa autopsy ang biktima subong nga adlaw agud mas madeterminar ang eksakto nga rason sang iya kamatayon.
Ginpahayag man sang kapulisan nga may yara na sila sang ginakabig nga “person of interest” nga posible may kahilabtanan sa krimen.
Indi magpati ang mga otoridad nga pangayaw ang nagpatay sa biktima bangud wala nagtaghol ang lima ka mga hinuptanan nga ido sang pamilya, kun sa diin posible kilala sang mga ido ang tawo nga naghimo sang krimen.
Dugang pa sang natungdan nga kun maguwa na ang result sang autopsy sang biktima, ginalantaw nga ang suspek ang indi maglayo sa dalaga, kun sa diin ginalantaw man nga possible kilala sang dalaga ang suspek nga naghimulos-patay sa iya.
Madumduman nga nasapwan-patay lang ang lawas sang biktima nga ginkilala kay alyas Jeje sa sulod sang iya kwarto, kun sa diin may hanog sa mata kag wala sang pang-idalom nga panapton.
Padayon ang koordinasyon sang Tubungan PNP sa mga himata, abyan, kag kilala sang biktima agud makuha ang dugang nga impormasyon nga makabulig sa imbestigasyon.
