ILOILO CITY – Nagapangatubang sang kaso nga Grave Threat kag Conduct Unbecoming of a Police Officer ang duha ka hubog matapos nagpalupok kag nagpamahog nga patyon ang ila hepe sa Pototan Iloilo.
Ang mga arestado amo sanday Patrolman Joerick Ace Ilisan kag Police Corporal Esil Peñarubia samtang ang ginpahog nga hepe amo si Police Major Ronnie Brillo, lunsay assign sa Pototan Municipal Police Station.
Suno kay Police Lt. Col Joem Malong, tagpamaba sang Police Regional Office VI, iya ginpahayag nga nagpatigayon sila sang inspeksyon sa Pototan Municipal Police Station.
Diri kag naabtan sanday Ilisan kag Peñarubia nga naga-inom kag wala pa nakasuksok sang uniporme.
Sang amo nga tion wala naman ang hepe bangud nagpadulong ini sa hamyang ni the late PSSgt Jessie Pamado sa Barangay Lumbo, Pototan.
Pagbalik sang hepe sa police station, diri na kag iya nga gin akigan ang duha ka mga pulis.
Apang sa baylo nga magpa-umod, nagbato pa si Ilisan kadungan sang pagpahog kay Brillo nga patyon niya ini.
Magluwas sini, nagpalupok man sa gwa sang police station si Ilisan gamit ang iya 9mm service pistol.
Gilayon naman si Brillo nga nagpangayo sang bulig sa Special Weapons and Tactics sang Iloilo Police Provincial Office matapos ang insidente.
Ginkumpiska naman ang 9mm service pistol ni Ilisan .
Sa subong, preso ang duha ka mga pulis.
