Duha ka mga Ilonggo ang naghatag sang bugal sa Pilipinas matapos nakabaton sang pagkilala sa duha ka mga bantog nga unibersidad sa Japan.
Ang una amo si Dr. Paul Caesar Flores sang Jibao-an, Pavia, Iloilo, nga nakabaton sang President’s Award kag Dean’s Award sa Yokohama National University.
Si Flores ang nagkuha sang kurso nga Bachelor of Science in Geology kag Master’s Degree sa Marine Science sa University of the Philippines Diliman.
Nagtapos naman ini sang iya Doctor of Science in Earth Science, sa Yokohama National University.
Ikaduha naman amo si Dr. Marivic Pepino, sang Jordan, Guimaras, nga nagbaton sang Graduate Student Research Encouragement Award kag Outstanding Academic Achievement Award sa Kochi University.
Si Pepino ang nagkuha sang kurso nga Bachelor of Science in Biology kag Master’s Degree sa Biology sa University of the Philippines Visayas.
Sa interview sang Bombo Radyo kay Flores, iya ginpahayag nga ang pasidungog nga iya nabaton ang bangud sa iya kontribusyon sa Earth Science.
Suno kay Flores, antes ang COVID-19 lockdown sang 2020, nagpasakop ini sa Sakura Science Program, isa ka programa sang Japan Agency for Marine-Earth Science and Technology (JAMSTEC) nga naga-imbitar sa mga scholars halin sa nagkalain-lain nga pungsod.
Pinaagi sa sini nga programa, nahatagan siya sang kahigayunan nga makuha ang scholarship, sa diin may ginabaton ini nga monthly stipend para sa iya doctoral studies.
Samtang suno naman kay Dr. Pepino, wala nangin mahapos ang iya pagtuon sa luwas sang pungsod, apang bangud sa mga scholarship kag research grants, nangin madinalag-on ini.
Sang 2022, nag-apply siya para sa isa ka scholarship sa UP Visayas nga nagahatag sang oportunidad nga makatuon sa Japan.
Sa pihak sang mga pagtilaw nga iya naagyan sa luwas sang pungsod, nagapabilin nga determinado si Dr. Pepino sa iya handom nga magpadayon sa research kag education.
