Imbestigaran pa sang Tubungan Municipal Police Station ang ginapahayag duha ka ginasuspetsahan nga mga miyebro sang rebelde nga grupo nga amo ang ginapatihan nga may kahilabtanan sa pagpalupok sang hanging improvised explosive device (IED) sa Sitio Kipot, Barangay Balicua, Tubungan, Iloilo.
Sa interview sang Bombo Radyo kay Pol. Lt. Jose Rommel Samson, hepe sang Tubungan Municipal Police Station, iya ginpahayag nga may yara sang witness nga nakareport nga may nakit-an nga suspected rebels sa lugar nga natabuan sang insidente.
Wala na naghatag sang dugang nga detalye ang hepe bangud padayunon pa ang pagpangusisa bwas nga adlaw, Disyembre 18.
Gin-ako ni Samson nga wala gid ginpanan-aw sang kapulisan ang amo nga pagpang-atake bangud suno sa iya, wala sang reported presence sang Communist Party of the Philippines -New People’s Army sa amo nga lugar antes ang nasambit nga hitabo.
Kaina sang hapon, sang nag-agi ang patrol car sang Tubungan Municipal Police Station sa Sitio Kipot, gulpi lang nga may naglupok, nag-crack ang windshield sang salakyan, kag nagbatyag sang sakit si Samson sa iya nga siko.
Wala na nagpundo pa ang patrol vehicle bangud posible magtuga pa sang dugang nga halit kun may encounter nga matabo sa tunga nila kag sa New People’s Army ilabi na bangud may mga pamalay sa nasambit nga sitio.
Sang nagtawhay na kag ginbalikan ang lugar, narecover sang otoridad ang anti-personnel mine kag 150-meter long kag duag itom nga firing wire.
Kaangay sang statement sang Iloilo Police Provincial Office, ginpahayag man ni Samson nga posible nga na-track sang mga rebelde ang ila nga mga aktibidad bangud pakadto-pakari ang ila nga patrol car sa sulod na sang isa ka semana bangud sang ila aktibidad may kaangtanan sa kampanya batok sa local communist armed conflict.
