Pormal na nga ginpasakaan sang reklamo sang National Police Commission (NAPOLCOM) ang anum ka policer officer matapos ginatudlo nga lakip sa siyam ka mga suspek sa pagpang-holdap sa East Grace Park, Caloocan City sang damlag lang.

Base sa imbestigasyon, ang siyam ka ginatudlo nga mga suspek ang ginalakipan sang isa ka Police Major sang Criminal Investigation and Detection Group (CIDG), Police Captain, Police Senior Master Sergeant, Police Corporal, duha ka Patrolman, isa ka sibilyan kag duha ka wala pa nakilal-an nga mga indibidwal.

Samtang, ang mga biktima ang isa ka negosyante kag isa ka police patrolman nga naka-assign sa Philippine National Police Drug Enforcement Group (PNP-DEG).

Base sa panaysayon sang mga biktima, nagpakuno-kuno nga buyer ang mga suspek sa baligyaanay sang gold bracelet nga nagabalor ₱700,000.

Nataban sang mga ini ang ginabulubanta ₱1.2 milyon nga balor sang gamit lakip na ang alahas, Honda ADV 160, tatlo nga cellphone kag service firearm.

Arestado na sa karun ang police major kag nagapangatubang sang criminal complaint.

Samtang, padayon naman nga ginaayam ang sang kapulisan ang lima pa ka at-large nga mga pulis.

Dugang pa, nagmando naman si PNP Chief PGen. Jose Melencio Nartatez Jr. nga umpisahan na ang summary dismissal proceedings batuk sa mga pulis nga lakip sa nasambit nga insidente.