Gintawag ni National Bureau of Investigation (NBI) Director Melvin Matibag nga ‘chismis’ lamang ang alegasyon angut sa ginapahayag nga pagpamahog kag pagpwersa sa anay household staff ni Vice President Sara Duterte nga magpirma sang dokumento.
Suno kay Matibag, wala pa nakabaton ang NBI sang opisyal nga report angut sa nasambit nga insidente kag ginpabug-atan sini nga kinahanglan anay sang pormal nga reklamo kag ebidensya antes magsugod sang imbestigasyon.
Ginpanawagan man sini sa mga nagakabalaka sa kaluwasan sang anay staff nga i-report ang insidente sa kapulisan ukon sa Presidential Anti-Organized Crime Commission (PAOCC) kon indi sang mga ini gusto magpalapit sa NBI.
Ginkwestyon man ni Matibag ang halos dululungan nga mga social media posts angut sa alegasyon, nga suno sa iya daw may koordinasyon ang mga ini.
Matandaan nga ginapahayag nga nakabatun ang bise president sang mensahe halin sa account sang iya former household staff member sang Nobyembre 16 kag nagapangayo ini sang bulig.
Ini ang mismo nga ginpakigbahin ni Atty. Paolo Panelo, legal spokesperson ni VP Sara pinaagi sa iya social media post.
Base sa nangin pahayag ni Panelo, ginaalegar nga yara sa idalom sang kustodiya ukon control sang pila ka indibidwal sa Manila ang nasambit nga staff member kag ginapilit man ini nga magpirma sa isa ka dokumento.
Sa subong, wala pa nahibaluan kun sa diin kag kun ano ang sitwasyon sang nasambit nga staff member ni VP Sara.
Sa pihak nga bahin, ginakabig ni House prosecution spokesperson Zia Alonto Adiong nga posible nga diversionary tactic ang alegasyon nga pagpamahog angut sa anay household staff ni Vice President Sara Duterte agud maliso ang atensyon sang publiko halin sa impeachment trial sang bise presidente.
Suno kay Adiong, posible nga paagi ini sang kampo ni Duterte agud indi na matutukan sang publiko ang isyu sang grave threats nga ginapahayag nga ginhimo sang bise presidente.
Samtang, nagpahayag man si Palace Press Officer Claire Castro nga nakapokus si President Ferdinand Marcos Jr. sa mga kinahanglanon sang pungsod kag sa bag-o lang nagtakop nga ASEAN Summit 2026.
Ini ang kasunod sa pagpati ni Atty. Paolo Panelo, legal spokesperson ni VP Sara, nga kabahin ini sang tikang sang Marcos Administration nga gamitun ang institusyon sang estado kaangay sang NBI agud mamilit sang mga indibidwal agud magserbe nga fake witness batok sa Bise Presidente.
Gindugang ni Castro nga dapat imbestigaran ang nasambit nga alegasyon bangud wala sang lugar ang fake news sa administrasyon.














