Ginlaragway sang Consuma PH nga indi realistic ang ginpresentar nga P22 nga budget para sa isa ka meal sang isa ka Pilipino.
Sa interview sang Bombo Radyo kay Atty. Nathaniel Oducado, founder sang nasambit nga organisasyon, iya ginpahayag nga ang P22 budget ang wala nagasanto sa aktuwal nga presyo sang mga balaklon kag pagkaon sa mercado.
Suno sa iya, kinahanglan usisaon liwat ang datos nga ginpresentar sang Philippine Statistics Authority (PSA) kag Department of Social Welfare and Development (DSWD) angut sa food poverty.
Pahayag ni Oducado, nagataas na ang presyo sang mga pagkaon, lakip na ang itlog kag bugas kun sa diin ang itlog sang una ang nagabalor lamang sang P5, apang sa subong nagalab-ot na ini sa ?12.
Samtang, ang presyo naman sang bugas yara na sa ?50 kada kilo.
Ginpunto ni Oducado, indi lamang ang presyo ang dapat lantawon kundi pati ang sustansya nga makuha sang isa ka tawo sa iya pagkaon bangud nga kun kulang ang budget para sa pagkaon, posible ini makaapekto sa ikaayong-lawas sang mga Pilipino.
Bangud sini, ginapanawagan sang Consuma PH nga repasuhon kag i-angay sa aktuwal nga sitwasyon ang mga datos kag budget nga ginagamit sa pagdeterminar sang food poverty.
