Nagahulat ang pila ka mga barangay sa Iloilo City sa libre nga distribusyon sang tubig halin sa city government kasunod sang kakulang sang suplay bangud sa El Niño phenomenon.
Ini matapos nga ang pila ka mga bubon sa distrito sang City Proper ang may pagnubo na ang water level, nga amo ang isa sa mga source sang tubig sang mga residente para sa ila adlaw-adlaw nga kinahanglanon pareho sang pagpaligo kag pagpanghugas.
Sa interview sang Bombo Radyo kay Punong Barangay Arnold Roga sang Brgy. Muelle Loney, City Proper, iya ginpahayag nga daku nga bulig sa mga residente ang libre nga distribusyon bangud kon wala ini, napilitan ang iban nga magbakal sang tubig sa mga pribado nga tanker kun sa diin tag-P5 kada container sin.
Suno sa kapitan, may mga water tank nga ginapahamtang sa nagkalain-lain nga zona, ilabi na sa mga lugar nga madamo ang residente agud mas mahapos ang pagkuha sang tubig.
Pahayag niya, ang water tank ang may yara mga bantay nga nagabulig sa pag-facilitate sang distribusyon agud nga masiguro nga patas ang ginakuha sang kada ka residente.
Ginpakigbahin man ni Roga nga may mga residente ang konektado sa Metro Pacific Iloilo Water, apang masami man ini wala nagatubod rason nga ginipili na lamang sang mga pumuluyo nga magbakal sang tubig kada container.
Dugang pa, ginapanawagan sangh kapitan sa iya nga mga pumuluyo nga magtipid sang tubig samtang ginahulat pa ang dugang nga distribusyon halin sa syudad.
