Temporaryo nga ginpauntat ang tanan nga flights sa United States tubtob sa sunod nga pahibalo bangud sa indi kinaandan nga sitwasyon kag para masiguro ang seguridad sang mga pasahero.
Suno sa Federal Aviation Administration (FAA), may problema sa communication system sang mga Air Route Traffic Control Center nga nagadumala sang mga eroplano nga nagabiyahe sa nagkalain-lain nga bahin sang pungsod.
Base naman sa una nga mga report sang mga opisyal sang law enforcement, indi cyberattack ang ginapatihan nga kabangdanan sang problema.
Padayon man nga ginamonitor sang mga personnel sang Federal Bureau of Investigation (FBI) sa nagkalain-lain nga bahin sang pungsod ang sitwasyon.
Suno sa flight-tracking website nga Flightradar24, yara sa 3,100 ka eroplano ang nagalupad pakadto sa mga airport sa United States, apang wala na sang dugang nga mga eroplano nga ginatugutan nga maghalin.
Gin-athag man sang FAA nga isa-isa nga usisaon kag pagadumalahan ang mga international flights nga nagapasulod sa nasambit nga pungsod.
Suno sa rekord, Enero 2023 sang ulihi nga nagpatuman sang nationwide ground stop sa United States matapos magpalya ang sistema para sa mga abiso sa mga piloto.
Antes sini, ang katapusan nga nationwide ground stop ang ginpatuman kasunod sang September 11, 2001 attacks.#
