Gindepensahan sang Malacañang ang ginpain nga P22.9 billion nga pondo sang gobyerno para sa pag-host sang Pilipinas sa 2026 Association of Southeast Asian Nations (ASEAN) Summit.
Kasunod ini sang pagpakamala-ot kag pagkwestyon sang publiko nahanungod sa kadakuon sang gin-alokar nga budget.
Suno kay Palace Press Officer Claire Castro, indi dapat magbuya sang basol batok kay President Ferdinand “Bongbong” Marcos Jr. ang mga tawo kun wala sang nagakaigo nga basehan.
Ginpunto man sini nga nagapanguna nga tinutuyo sang presidente ang pagpauswag sang pungsod kag pagpakamaayo para sa mga Pilipino, baliskad sa ginasiling sang iban nga pagpakamaayo lamang sa personal nga imahe sini.
Dugang pa ni Castro nga ang ini nga tikang kag desisyon sang administrasyon, dapat i-presyar base sa tinutuyo sini kag ang mga konkreto nga resulta, kag indi lamang sa mga alegasyon nga wala sang nagakaigo nga ebidensya.
