Nagrekomendar si Committee on Engineering, Constructions, and Public Works Chairperson City Councilor Johnny Young sa City Council nga i-deny anay ang ginpangabay nga resolusyon nga magahatag authorization kay Iloilo City Mayor Raisa Treñas nga magpirma sang application para sa building permit sang pagatukoron nga sports arena sa Barangay Balabago, Jaro.
Sa committee report nga ginpresentar ni Young sang Miyerkules, Nobyembre 11, ginpahayag niya nga ang ginaplanohan nga sports arena isa ka three-story facility nga ginabulubanta maga-occupy sang 3,300 square meters halin sa 10,000-square-meter nga property kag may seating capacity nga masobra 4,000.
Dugang pa, may yara na sang natapos nga Phase 1 sang proyekto nga nagalakip sa foundation kag pila ka structural columns, nga nagabalor sang P26 million.
Samtang, nagakinahanglan pa sang dugang nga P350 million para makompleto ang Phase 2 sang sports arena.
Apang, wala ini na-aprubahan sa 2027 budget sang Department of Public Works and Highways (DPWH)-6, gani padayon pa nga pangitaon ang pondo para sa proyekto sa 2028 national budget.
Suno sa komitiba, indi ang kakulang sang pondo ang panguna nga rason sang ila rekomendasyon kundi ang isyu sa legal nga pagpanag-iya sang lote.
Dugang pa ni Young, may ginpatigayon nga committee hearings sang October 20 kag November 5, 2026, kung sa diin natukiban nga ang property gin-donate sang Alta Tierra Homeowners Association Incorporated (ATHAI) sa Barangay Balabago kag indi direkta sa Iloilo City Government.
Gani, ang awtoridad ni Treñas sa pagpirma sang mga application para sa building permit kag ang representasyon nga ang Iloilo City Government amo ang tag-iya sang duta wala pa ma-establisar sang maayo.
Dugang pa diri, may yara sang existing Memorandum of Agreement (MOA) sa tunga sang ATHAI kag Barangay Balabago nga nagahatag sang mutual rights sa homeowners association sa paghimo sang mga polisiya, regulasyon, pagdumala kag paggamit sang pasilidad.
Sa sini, ginrekomendar sang komitiba nga solbaron anay ang isyu sa ownership sang property, klaruhon ang legal implication sang MOA kag mapat-od ang awtoridad sang Iloilo City Government sa lote antes hatagan sang permiso ang alkalde nga magpirma sang application para sa building permit.
Ginpaathag man ni Young nga ang rekomendasyon nga pag-deny sang resolusyon indi nagakahulugan nga ginakontra sang komitiba ang pagtukod sang sports arena, kundi tikang lamang agud maprotektahan ang interes sang Iloilo City Government, Barangay Balabago, ATHAI kag sang mga mangin manug-gamit sang pasilidad.
Text by: Bombo Cyrene A. Nasis
