Gin-anunsyo sang Malacañang subong nga Biyernes nga gin-appoint ni President Ferdinand Marcos Jr. si Commission on Audit (COA) Chairman Gamaliel Cordoba bilang bag-o nga Associate Justice sang Supreme Court.
Ginkumpirmar man ni Palace Press Officer Undersecretary Claire Castro ang appointment ni Cordoba sa isa ka press briefing.
Ginbuslan ni Cordoba si Associate Justice Amy Lazaro-Javier nga magaretiro sa Nobyembre 16. Si Lazaro-Javier ang gin-appoint sa puwesto ni anay Presidente Rodrigo Duterte.
Si Cordoba amo ang ikatatlo nga mahistrado nga gin-appoint ni Marcos sa Supreme Court. Antes sini, gin-appoint sang Presidente si Associate Justice Raul Villanueva sang 2025 kag si Chief Justice Rodil Zalameda umpisa sini nga Nobyembre.
Suno sa pila ka sources, malapit ang relasyon ni Cordoba sa Presidente kag kay First Lady Liza Araneta-Marcos.
Sang 2022, gin-appoint ni Marcos si Cordoba bilang COA Chairman nga nagapanguna sa ahensiya nga may mandato nga mag-usisa kag mag-audit sang mga transaksiyon kag pondo sang gobyerno kag sang mga ahensiya sini.
Antes mangin COA Chairman, nangin commissioner man si Cordoba sang National Telecommunications Commission (NTC) halin 2009, sa idalom sang administrasyon ni anay Presidente Gloria Macapagal-Arroyo kag ginpadayon man sa puwesto ni anay Presidente Duterte.
Sa panahon sang iya pagpamuno sa NTC, wala na-renew ang prangkisa sang ABS-CBN sang 2020 sa idalom sang administrasyon ni Duterte. Nagresulta ini sa pagkadula sang obra sang sobra sa 5,000 ka mga empleyado sang network.
Sa tunga sang kontrobersiya, ginpahayag ni Cordoba nga wala sang pending nga penalidad ang ABS-CBN sa idalom sang komisyon.#
