Pagatalakayon sang mga lider sang Association of Southeast Asian Nations ukon ASEAN ang nagkalain-lain nga problema sa rehiyon, lakip na ang epekto sang krisis sa Middle East, food security, kag transnational crime sa nagkalain-lain nga pungsod.
Suno sa Department of Foreign Affairs (DFA), kabahin sa mga topiko ang mga tikang agud maatubang ang epekto sang krisis sa Middle East, partikular sa suplay kag pagsaka sang presyo sang gatong.
Ginpasalig man ni ASEAN Affairs spokesperson Dominic Xavier “Dax” Imperial ang pagpalig-on sang proteksyon kag kaayuhan sang mga overseas Filipino workers (OFWs), ilabi na sa tunga sang nagapadayon nga krisis sa Middle East.
Sa Nobyembre 14, pagapangunahan ni DFA Secretary Ma. Theresa Lazaro ang ulihi nga meeting sang mga foreign minister sang ASEAN.
Kabahin man sa ila pagatalakayon ang pagpatuman sang ASEAN Five-Point Consensus.
Samtang, pangunahan naman ni President Ferdinand Marcos Jr. ang ika-49 nga ASEAN Summit nga pagahiwaton halin bwas, Nobyembre 15 tubtob 17.
Lakip sa mga aktibidad ang mga meeting upod sa mga representative sang parliament, business sectors sang ASEAN.
Sa Nobyembre 17, pangunahan man ni Marcos ang ASEAN Plus Three Summit kag East Asia Summit agud mapabaskog pa ang kooperasyon sang mga pungsod kag masolbar ang nagkalain-lain nga problema nga gina-atubang sa rehiyon.
