Magluwas sa rollback sa presyo sang produktong petrolyo, may buhin man ang fuel surcharge sa mga ticket sa eroplano.
Ini matabo sa second quarter sang Nobyembre matapos gin-aprubahan sang Civil Aeronautics Board (CAB) ang fuel surcharge kadungan sang paghina sang presyo sang jet fuel sa international market.
Suno sa Civil Aeronautics Board, ipatuman ang Level 16 fuel surcharge halin Nobyembre 16 tubtob 30, mas manubo kumpara sa Level 17 nga ginpatuman sadtong una nga bahin sang bulan.
Sa idalom sang bag-o nga level, ang sukot sa mga pasahero nga magabyahe sa domestic flights ang naga-rate halin sa ₱525 tubtob ₱1,535.
Samtang, para naman sa international flights, naglab-ot naman ini sa ₱1,733.76 tubtob ₱12,891.29 kada pasahero.
Base sa datos sang International Air Transport Association, nagnubo sa 178.95 US dollar kada bariles ang presyo sang jet fuel sadtong Nobyembre 6 halin sa anay 191.54 US dollar sadtong nagligad nga semana.
