Maganubo sang gamay ang fuel surcharge sa mga eroplano umpisa subong nga semana matapos gin-aprubahan sang Civil Aeronautics Board (CAB) ang pagbuhin sang sukot halin sa Level 17 pakadto sa Level 16.
Suno sa advisory sang CAB, ipatuman ang bag-o nga level sang fuel surcharge halin Oktubre 16 tubtob 31.
Sa idalom sang Level 16, makasukot ang mga airline sang dugang nga P525 tubtob P1,535 sa kada pasahero para sa domestic flight.
Samtang sa international flights, magahalin sa P1,733.76 tubtob P12,891.29 ang fuel surcharge sa kada pasahero.
Mas manubo ini kon ikumparar sa nagligad nga Level 17, diin ang sukot sa domestic flights nagahalin sa P559-P1,635. Sa international flights, nagahalin man ini sa P1,846.10 tubtub P13,726.58.
Ang fuel surcharge amo ang dugang nga bayad sa pamasahe agud matabunan ang epekto sang pagbag-o sang presyo sang fuel.
Sandig sa resolusyon sang CAB, mahimo lamang nga madula sang bug-os ang fuel surcharge kun ang average nga presyo sang jet fuel sa sulod sang isa ka bulan ang mas manubo sa P21 kada litro.
