Magasaka ang plete sa eroplano para sa mga magabiyahe pakadto kag paguwa sa Pilipinas sa una nga 15 ka adlaw sa Nobyembre.
Sa advisory subong nga adlaw, Oktubre 27, ginpataas sang Civil Aeronautics Board (CAB) sa Level 17 ang fuel surcharge nga ipatuman halin Nobyembre 1 tubtob 15, halin sa Level 16 sa second half sang Oktubre.
Sa idalom sang Level 17, mahimo magpatuman ang mga airline sang fuel surcharge nga nagabalor sa P559 tubtob P1,635 kada pasahero para sa domestic flights.
Samtang, para sa international flights, mahimo maglab-ot sa P1,846.10 tubtob P13,726.58 ang fuel surcharge sa kada pasahero.
Mas mataas ini kon ikumpara sa Level 16 sa diin naga-range sa P525 tubtob P1,535 ang surcharge para sa domestic flights, samtang P1,733.76 tubtob P12,891.29 naman para sa international flights.
Ang fuel surcharge amo ang dugang nga bayad nga ginasukot sang mga airline magluwas sa base fare agud makabawi sa pagbag-o sang presyo sang gatong nga ginagamit sang ila mga eroplano.#
