Ginapanawagan sang Consuma PH ang mas aktibo nga interbensyon sang gobyerno sa sektor sang pagkaon, lakip na ang paghatag sang direkta nga suporta sa mga mangunguma, agud mapanubo ang presyo sang mga balaklon.
Sa interview sang Bombo Radyo kay Atty. Nathaniel Oducado, founder sang nasambit nga organisasyon, iya ginpahayag nga isa sa mga rason sang pagsaka sang presyo sang pagkaon amo ang pagsalig sang Pilipinas sa imported nga produkto.
Suno sa iya, bisan mas barato ang imported nga mga produkto, mahimo ini nga makaapekto sa palangabuhian sang lokal nga mga mangunguma kag nagataas man ang logistics cost nga nagadugang sa kabug-usan nga presyo sang mga produkto.
Ginpunto ni Oducado nga kinahanglan hatagan sang gobyerno sang direkta nga bulig ang mga mangunguma, indi lamang paagi sa abono kundi pati sa iban pa nila nga kinahanglanon sa pagpanguma.
Lakip sa ginapanawagan sang organisasyon ang paghatag sang food subsidies kag pagpatuman sang strategic food reserves agud masiguro nga may bastante nga suplay sang pagkaon sa pungsod.
Ginpahayag man ni Oducado nga kabahin sang ila nga ginaduso sa 49th ASEAN meeting ang pagrepaso sa mga taripa ukon tax sa mga produkto, ilabi na sa teknolohiya kag pagkaon.
Pagpaathag niya, bisan may kasugtanan ang mga pungsod sa ASEAN angut sa zero tariffs, may mga lokal nga polisiya sa kada pungsod nga mahimo gihapon magpataas sang presyo sang mga produkto.
Bangud sini, luyag sang grupo nga madiskusyunan ang posibilidad sang pagbuhin sang mga tax agud mabuligan ang pagpanubo sang adlaw-adlaw nga gasto kag cost of living sang mga Pilipino.
