Ginakwestyon sang General Alliance of Workers Association (GAWA) kun ngaa indi mabatyagan ang pagnubo sa presyo sang mga nagapanguna nga balaklon apisar nga duha na ka sunod-sunod nga semana nga may rollback sa produktong petrolyo.

Sa interview sang Bombo Radyo kay Wennie Sancho, Secretary General sang GAWA, iya ginpahayag nga madugay mabatyagan sa mga ordinaryo nga mga pumuluyo ang rollback sang balaklon sang mga basic needs.

Pahayag pa sini, sa tion nga may price hike sa gasolina, gilayon man nga nagataas ang presyo sang mga balaklon kaangay sang isda kag bugas, gani nga isa ka daku nga palamangkutanon subong kun ngaa indi mabatyagan ang epekto sang pagnubo sang oil prices.

Nahibaluan nga kaina sang aga, P3.80 kada litro ang ginbuhin sa diesel, P1.50 kada litro sa gasolina, kag P5.80 kada litro sa kerosene.

Nauna naman nga ginsiling sang Department of Energy (DOE) nga posible magpadayon sa masunod nga semana ang rollback bangud sang paborable nga developments sa global oil market.