Nagpatigayon sang inspeksyon ang Department of Energy (DOE) sa mga gasolinahan sa pungsod kasunod sang mga report nga may pila ka estasyon nga naubusan sang diesel bangud sang pagdagsa sang mga motorista nga nagpatughong antes ang big-time oil price hike kahapon sang aga, Hulyo 21.
Suno kay DOE Oil Industry Management Bureau Director Rino Abad, gilayon nga nga nagkadto ang ila mga inspection team matapos makabaton sang report ang ahensya may kaangtanan sa posible nga kakulang sang suplay sang diesel.
Ginpahayag ni Abad nga gintugyanan na ang tanan nga field offices sang DOE kag ang personnel sang ila head office nga hugot nga bantayan ang mga gasolinahan sa bug-os nga Pilipinas.
Luwas sa pagbantay batok sa posible nga hoarding sang suplay sang fuel, ginamonitor man sang ahensya kun ginasunod sang mga gasolinahan ang ginmandu nga price adjustment sang gobyerno.
May yara sang 14,000 ka gasolinahan sa bug-os nga pungsod kag gin-ako ni Abad nga indi nila maubos sa pag-inspeksyon ang tanan. Apang ginpaandaman sini ang gasoline stations nga mangatubang sila sang daku nga penalidad kun madakpan nga naga-hoard ukon wala nagasunod sa ginpatuman nga price adjustment.
Nagpadayon ang inspeksyon nga nagsugod sang Lunes kag magalawig tubtob Biyernes samtang posible man ini nga mapalawig pa sa masunod nga semana.
Suno pa kay Abad, gilayon nga ginapadala sa legal office sang DOE ang mga inspection report agud masugudan ang pag-isyu sang show-cause orders kag iban pa nga legal nga tikang batok sa mga violators.
Nahibaluan nga masobra sa P10 kada litro ang ginsaka sa presyo sang diesel epektibo kahapon bangud sa panibag-o nga tension sa Middle East.#
