Makaapekto sa mataas na nga daan nga presyo sang kuryente sa Pilipinas ang padayon nga pagluya sang piso batok sa dolyar.
Ginpahayag ini ni Energy Secretary Sharon Garin matapos nagsarurot pa ang piso sa 64.17 kada isa ka dolyar base sa Bankers Association of the Philippines (BAP) sa pagtakop sang trading kahapon, Oktubre 27.
Suno kay Garin, posible nga makaapekto sa balayran sa kuryente ang pagluya sang piso bangud ang pila ka dugang nga gasto nga apektado sang pagbaylo sang kwarta ginapasa sa mga konsumidor.
“It will impact the rate of electricity since pass through sya eh, will impact the per kilowatt. We’ll check if there’s any way we can delay or maybe lessen the impact but that is something I will have to discuss with ERC, but yes, that will have an impact,” suno sa tiglikom kadungan sang Singapore International Energy Week.
Ginpahayag ni Garin nga usisaon sang Department of Energy (DOE) kun may paagi agud mahagan-hagan ang epekto sini sa presyo sang kuryente paagi sa pagpakig-angut sa Energy Regulatory Commission ukon ERC.
Magluwas sa kuryente, posible man nga magpataas sa presyo sang mga produktong petrolyo ang pagluya sang piso.
Suno kay Garin, handa ang DOE nga liwat magpangabay sa mga kumpaniya sang langis nga pahat-pahaton ang mga pagsaka sang presyo agud mapahagan-hagan ang epekto sini sa mga konsumidor.
Nahibaluan nga kun magluya ang piso, ang una nga epekto sini sa ordinaryo nga mga panimalay amo ang pagsaka sang presyo sang mga balaklon. Bangud daku ang pagsalig sang Pilipinas sa mga gina-import halin sa iban nga pungsod, pareho sang enerhiya, raw materials, kag mga produkto sa agrikultura, ang pagnubo sang balor sang piso nagadugang sa galastuhon sa adlaw-adlaw nga pagkabuhi.#
