Naghingyo ang mga prosecutor sang International Criminal Court (ICC) sa Trial Chamber III nga batunon ang nauna na nga na-record nga testimonya sang duha pa ka testigo nga gin-alegar nga naghatag sang ebidensya kaangot sa papel ni Senator Ronald “Bato” dela Rosa sa drug war ni anay Presidente Rodrigo Duterte.
Sa isa ka pampubliko nga dokumento nga may petsa nga Oktubre 26 kag may redacted details ukon mga detalye nga gintago, ginpangabay ni Acting Prosecutor Mame Mandiaye Niang nga batunon ang nauna na nga mga pahayag sang mga saksi nga ginkilala bilang sanday P-1334 kag P-1348 sa baylo nga magtestigo sila mismo sa trial.
Ginbase ni Niang ang iya pangabay sa Rule 68(2)(b) sang Rules of Procedure and Evidence sang ICC.
Suno sa prosekusyon, naghatag man sang impormasyon ang duha ka testigo kaangot sa “target lists of drug personalities”, kag ang ginaalegar nga “killing quotas”, kag “financial rewards.”
TESTIMONIYA NI P-1334
Ginalaragway ni P-1334 ang pagtukod, estruktura, sistema sang pag-report kag importante nga mga persona sang isa ka organisasyon nga gin-redact ang pangalan sa public document.
Naghatag man ini sang impormasyon kaangot sa gin-alegar nga papel ni Dela Rosa sa kampanya kontra droga. Nangin hepe si Dela Rosa sang Philippine National Police ukon PNP halin Hulyo 2016 tubtob Abril 2018.
Suno sa prosekusyon, ginpahayag sang testigo nga si Dela Rosa ang nagadumala sa pagpalapnag sang mga mando nga patyon ang mga tawo sa tion sang drug war, apang, wala ginklaro sa pampubliko nga dokumento kun kay sin-o naghalin ang mga mando nga ini.
Naghatag man ang amo nga testigo sang impormasyon kaangot sa pag-identify kag paghatag prayoridad sa target lists sang suspected drug personalities kag sa mga pagpamatay nga naangot sa alleged policy.
Gin-angot man sang prosekusyon ang testimonya ni P-1334 sa Incident 13 kag Incident 53 nga ginlaragway sa ila trial brief.
Ang Incident 13 amo ang insidente sang pagpaniro nga nagresulta sa kamatayon ni anay Albuera, Leyte Mayor Rolando Espinosa Sr. kag ni Raul Yap nga pareho ginapatihan nga involved sa illicit drug trade.
Samtang, ang Incident 53 naman amo ang pagpatay sa isa ka gin-alegar nagabaligya sang ilegal nga droga kag sa isa pa ka biktima nga ginpaniro sang mga operatiba sang PNP Anti-Illegal Drugs Group ukon AIDG.
Suno sa trial brief, sayop ang nakasulat sa police report nga napatay ang duha ka biktima matapos ang gin-obra sang mga operatiba nga self-defense.
TESTIMONIYA NI P-1348
Samtang, gindugang sang prosecution nga ginlaragway ni Witness P-1348 ang mga operasyon kontra droga antes ang Hulyo 2016, ang pagpatay sa pila ka indibidwal nga yara sa redacted lists, kag ang pagdamo sang mga pagpatay matapos nangin presidente si Duterte.
Suno sa prosecution, ang testimonya ni P-1348 nagahatag sang ebidensya sang… [REDACTED] … sang July 2016 kag sa “climate of violence” sa Pilipinas sa pagsugod sang presidential period, kag ginakabig nga ebidensya sang polisa nga pag-“neutralize” sa alleged criminals paagi sa “violent crimes.”
“The associated material for P-1348, which the prosecution seeks to introduce into evidence, forms an integral part of his Prior Recorded Testimony. These items are also necessary to fully comprehend the witness’s account, as she uses and explains them in his statement,” suno sa filing sang prosecution team.
Samtang, may yara man sa dokumento sang mga pagmitlang sa testimonya sang duha ka testigo kaangot sa gin-alegar nga kaangtanan ni Duterte sa Davao Death Squad kag sa mga drug cartel.
Nalakip man diri ang mga alegasyon kaangot sa pagpuntariya sa mga mayor nga wala nagsuporta sa iya, ang gin-alegar nga paggamit sang pondo sang gobyerno sa pagbayad, kag ang iya pampubliko nga panawagan sa mga nagagamit sang iligal nga droga nga magparehistro sa ila tagsa ka barangay.#
