Nag-resign sa pwesto ang Sangguniang Kabataan Chairperson sang Atabayan, Tigbauan, Iloilo nga si Peter Paul Cadano.
Sa interview sang Bombo Radyo kay Cadano, iya ginpahayag nga ang pagpaiway sang Barangay and Sangguniang Kabataan Elections (BSKE) subong nga tuig ang nagtulod sa iya nga mag-resign bangud nanugunan sila nga indi paghingalitan ang mga oportunidad nga nagbukas para sa ila.
Si Cadano isa man ka manunudlo kag naga-eskwela subong para sa iya handom nga Master’s degree nga amo anay ang iya luyag tutukan subong.
Suno kay Cadano, nalipay gid siya nga sang tion nga yara siya sa pwesto, madamo man ang ila nangin accomplishments paagi sa mga napatukod nga mga organizations kag partnership sa nagakalain-lain nga mga institusyon sa syudad sang Iloilo kag mga non-governmental organization.
Dako man ang iya pagpasalamat sa Local Government Unit sang Tigbauan sa ginhatag nga suporta sa iya.
Gintuad man ni Cadano nga magluwas sa iya, nag-resign man sa posisyon ang 1st kagawad nga si Leslie Kate Macaling bangud sa nagbukas nga oportunidad nga magtrabaho sa Bureau of Fisheries and Aquatic Resources (BFAR) Central Office.
Samtang ang 2nd kagawad naman nga si Carl Florence Camiña ang maga-resign man para magtrabaho sa Department of Education.
“After three meaningful years of service, I am grateful for the trust, lessons, and experiences that have shaped me as a leader. As I pursue further professional growth, I carry with me the values of integrity, accountability, and public service,” kabahin sang iya Facebook post kaangot sa iya resignation.
“Salamat guid, kabataang Atabaynon, nga mangin kabahin kang inyo istorya. Isa ka parte kang akon tagipusuon ang komunidad nga nagta-o kanakon kang pribilehiyo nga mamuno, kahigayunan nga makama-an, kag kadungganan nga makaserbisyo. The chapter may end, but the purpose lives on. Sa guihapon, ‘Para sa kabataan, kag para guid sa Atabayan’,” dugang sini.
Si Cadano ang nagpasa sang iya official resignation sang Oktubre 29 nga gin-aprubahan man sang amo nga adlaw ni Mayor Atty. Virgilio “Nene” T. Teruel, kag nangin epektibo sang Oktubre 31.
Ang magabulos kay Cadano amo si Giftsie Marie Wali.
