Nag-abot na ang 329,505 barrels ukon 44,119 metric tons sang krudo nga gin-import sang Pilipinas.
Suno sa Subic Bay Metropolitan Authority (SBMA), nabaton ini sang Philippine National Oil Company (PNOC) sa Port of Subic Bay paagi sa Philippine Coastal Storage and Pipeline Corporation (PCSPC).
Ginalauman nga makadugang ini sa fuel supply sang Pilipinas nga subong makaigu na lang sa 52.02 ka adlaw.
Suno sa SBMA, nag-isyu ang Bureau of Internal Revenue (BIR) sang special permit sa PNOC Exploration Corporation (PNOC-EC) agud nga mapadasig ang emergency importation sang mga produktong petrolyo.
Kun may kaangay sini nga permit, ginalaktawan na ang standard bureaucratic processes kag customs procedures nga amo ang makapa-atrasar pa sa pag-abot sang produkto nga baklon.
Nahibaluan nga maga-procure man ang PNOC-EC sang two million barrels sang langis kag 22,000 metric tons sang liquefied petroleum gas (LPG).
“These emergency stocks that are expected to augment around 10 days of the country s additional fuel supply and strengthen LPG reserves, are being secured in response to Middle East market disruptions,” suno sa SBMA.
