Nakapiyansa ang 20 anyos nga driver sang 10-wheeler truck nga nakabunggo sa Sports Utility Vehicle (SUV) sa Barangay Amamaros, Pototan, Iloilo matapos ginpasakaan sang kaso nga Reckless Imprudence Resulting to Double Homicide and Damage to Property.
Ang driver sang amo nga truck amo si Regent Albacete, residente sang Hibao-an Sur, Mandurriao, Iloilo City.
Sa interview sang Bombo Radyo kay Police Staff Sergeant Raffy Gonzales, traffic investigator sang Pototan Municipal Police Station, iya ginpahayag nga sang gin-usisa sang otoridad, kumpleto man ang dokumento ni Albacete nga nagapamatuod nga kwalipikado siya sa pagmaneho sang truck.
Suno kay Gonzales, 18 anyos pa lang si Albacete sang nag-umpisa ini sa pagmaneho sang salakyan.
Sa inisyal nga pahayag ni Gonzales sa Bombo Radyo, bukas man ang pamilya sang mga biktima nga makig-areglo sa driver sang truck.
Matandaan nga sa aksidente nga natabo sang Lunes, Abril 19, patay ang mag-asawa nga sakay sang SUV nga sanday Emil kag Merren Pagtolon-an, lunsay 36 anyos, residente sang Barangay Bagacay, Passi City.
