Nag-abante na ang World Cup debutants nga Cabo Verde sa knockout rounds matapos nagtakop sa 0-0 draw ang katapusan sini nga group match batok sa Saudi Arabia.
Sa pihak nga matchup sa Group H, ginlutos sang Espanya ang Uruguay, 1-0, nga nagakahulugan nga ikaduha ang Cabo Verde sa Spain sa ila grupo kag pareho nga sulod sa last 32.
Antes sini, lunsay draw man ang resulta sang hampang sini nga nasyon sa duha ka hampang: 0-0 draw batok sa former World Cup winner kag reigning European champions nga Spain, kag 2-2 draw batok sa two-time World champion nga Uruguay.
Maragtason ini nga edisyon para sa Cabo Verde bangud ini pa lamang ang ila una nga pagtapak sa World Cup.
Nagapang-64 ini sa FIFA ranking kag ini ang second-lowest-ranked team sa 10 ka African representatives sa World Cup subong nga 2026.
40-anyos naman ang ila goalkeeper nga si Vozhina nga una nakaagaw sang atensyon sang football fans matapos napunggan sini ang tanan nga attempt sang Spain para sa goals sa una nila nga pag-atubangay. Nangin kaundan man sang balita pati ang iloy ni Vozhina bangud ginbululigan ini sang U.S. State Department, FIFA, U.S. lawmakers kag Cape Verde football federation agud lamang nga makaabot ini sa Estados Unidos sang Amerika kag makalantaw sa iya bata.
Sa knockout rounds, makasambuwa sang Cabo Verde ang defending champions nga Argentina nga ginapangunahan ni Lionel Messi. Atubangon naman sang Spain ang runner-up sa Group J nga posible Algeria ukon Austria.
