Naka-abante na sa Round of 16 sang FIFA World Cup 2026 ang Argentina matapos nalampuwasan ang debutant nga Cabo Verde kag ang 40-anyos sini nga goalkeeper nga si Vozinha.
Naglab-ot sa extra time ang hampang sang defending champions batok sa world no. 67 nga team sa Round of 32 antes nakaginhawa kag nahaw-asan sanday Lionel Messi sang nagtakop ang hampang sa 3-2.
Si Messi amo ang naka-score sang imbukada nga goal sa 29th minute nga amo ang iya ika-20 na nga goal sa iya partisipasyon sa World Cup.
Sa second half, nakabalos si Deroy Duarte paagi sa close-range shot sa 59th minute nga wala nasalo sang decorated Argentina goalkeeper nga si Emiliano Martínez.
May tyansa pa kuntani ang Argentines nga makuha ang abanse sa 63rd minute apang ginbalabagan ni Vozhina ang kuntani ikaduha na nga goal ni Messi sa hampang.
Sa ika-72 nga minuto, na-save na naman ni Vozinha ang kuntani goal ni Messi nga halin sa free-kick sa gwa sang penalty box.
Sa fifth minute sang stoppage time, may pa-free kick liwat nga halin na naman sa gwa sang penalty box para kuntani sa ginapanan-aw na nga cinematic finish sa defending champions — apang ginpunggan ini liwat ni Vozinha rason nga nagdiretso sa 30 minutos nga extra time.
Sa extra time, una nga naka-goal ang Argentines paagi kay Lisandro Martinez sa 92nd minute, apang nagbalos na naman ang Cape Verdeans sa 103rd minute paagi kay Sidny Lopes Cabral.
Halos ginapanan-aw na ang daku nga upset ukon ang posible pagkadto sa penalty shootout, apang pag-abot sa 111th minute, may own goal si Diney (napasulod sa ila kaugalingon nga goal) nga amo ang nagtapos sang dream run sang Cabo Verde sa 2026 FIFA World Cup.
Walo ka saves ang nahimo ni Vozinha sa 90 minutos nga regulation time.
Antes sini, napabilib na sini ang kalibutan sa pito man ka saves batok sa former champions kag heavy favorites nga Spain. Lunsay draw ang ila resulta sa group phase nga natabo batok sa Spain, two-time champions nga Uruguay, kag Saudi Arabia.
Nahibaluan nga nakahimo sang maragtas ang Cabo Verde bilang pinakagamay nga nasyon nga naka-qualify sa knockout rounds sa World Cup.
Atubangon naman nanday Messi sa round of 16 ang Egypt nga amo ang nag-upset sa Australia paagi sa penalty shootout kaina sang kaagahon.
