Patay gid ang isa ka 22-anyos nga lalaki matapos ini nakaagum sang fatal injury sa ulo sang nabunggu-an sang truck sa Tabucan, Cabatuan, sang Nobyembre 10 sang gab-i.
Sa interview sang Bombo Radyo kay PCAPT. Mary Shen Gerbolinga, Officer in charge sang Cabatuan Municipal Police Station, iya ginpahayag nga halin sa Calinog ang biktima nga si Alyas Arly nga nagapadulong sa Iloilo City sang natabo ang insidente, samtang nagabyahe naman pakadto sa Maasin ang truck.
Suno sa iya, nakabunggo ang motorsiklo sa kasugalaw sini nga salakyan nga gintunaan sang patal sini nga pilas sa ulo kag mga bali sa tiil.
Gintinguhaan pa ang biktima nga dal-un sa ospital, apang gindeklarar na nga dead on arrival sa Ramon Tabiana Memorial District Hospital.
Ginpakigbahin man ni Gerbolinga nga gilayon nga ginpaidalom sa kustodiya sang kapulisan ang driver sang truck matapos ang insidente.
Apang nahibaluan man nga mahimo na ini nga malaguwa sa pasilidad matapos ang reglementary period.
Ini bangud wala man sang plano nga magpasaka sang kaso ang pamilya sang biktima kag maga-settle na lang sa nasambit nga driver.
