Nagareklamo ang mga pumuluyo sang Barangay Divinagracia, Aguinaldo kag Alalasan sa distrito sang La Paz bangud sa mga pre-cast U-drain ukon box culvert nga ginpang-stock sa kilid kag bahin sang dalanon nga nagapakitid sa dalan kag nagadala sang huol kag peligro sa mga nagalabay nga motorista kag pumuluyo.
Suno sa mga residente, nagalab-ot sa ginabulubanta nga 20 ka bug-os ang mga pre-cast drainage structure nga sunod-sunod nga ginpangbutang sa dalan halin Barangay Aguinaldo pakadto sa Divinagracia.
Ang mga ini amo ang mga prefabricated concrete structure nga may dalagko nga kabilya ukon reinforcing bars kag may porma nga kuwadrado ukon kahon ang ginagamit sa pag-construct sang drainage system.
Apang, samtang wala pa ini nagamit kag nagapabilin sa dalanon, nagakuhà ini sang daku nga espasyo sang malapad nga bahin sang kalsaada, gani may mga bahin nga nangin one-way na lamang ang dalan.
Sa interview sang Bombo Radyo kay Marvin Balgos, residente sang Barangay Aguinaldo, iya ginpahayag nga mabudlay na para sa ila ang presensya sang mga pre-cast drain bangud nagagutok ang dalan kag nagapadugang ini sang kabudlayan sa ila adlaw-adlaw nga pagpangabuhi.
Dugang pa sini, nagatipon ang mga basura sa palibot sang mga semento nga ini kag mabudlay ini limpyuhan.
Ginkabalak-an man ni Balgos ang mga nagalabaw nga kabilya sa mga pre-cast drain bangud posible nga makatuslok ukon makahalit sa mga kabataan kag iban pa nga nagalabay sa lugar.
Suno sa iya, halos tatlo na ka bulan nga nagapabilin sa Barangay Aguinaldo ang mga semento.
Bangud man sa peligro nga dala sang mga ginpang-stock nga drainage structure, indi na magamit sang husto ang basketball court sa lugar bangud mahimo ini makahalit sa mga nagahampang.
Ginpahayag man sang mga residente nga wala sila nakakita sang nagakaigo nga warning signs, barricades ukon iban nga safety precautions sa palibot sang mga pre-cast drain agud mahatagan sang pahibalo ang mga motorista kag pedestrians.
