Ginbuksan sang Iloilo City Government ang ikaduha nga RiseAble Center sa Delfin Jaranilla Learning Center sa distrito sang La Paz, nga nagahatag sang mas malapit nga access sa mga serbisyo para sa mga kabataan, ilabi na sa may Autism Spectrum Disorder (ASD).
Suno kay Mayor Raisa Treñas, kabahin ini sang handum sang Iloilo City Government nga mapalapit sa tagsa ka pamilya ang serbisyo kag suporta nga kinahanglan sang ila mga kabataan sa temprano nga bahin sang ila development.
Dugang pa sang alkalde, handum niya nga makapatindog sang RiseAble Center sa tagsa ka distrito agud indi na mabudlayan ang mga ginikanan sa pagdala sang ila kabataan sa malayo nga pasilidad.
Samtang, ginakonsiderar man ang pagpatindog sang dugang nga center sa Barangay Bo. Obrero sa bulig sang Assumption.
Ang una nga RiseAble Center sa distrito sang Molo, nga ginbuksan sang Oktubre 8, 2025, nagaserbisyo sa mga kabataan halin sa Molo, Arevalo kag Mandurriao.
Base sa datos nga ginpaambit ni Treñas, halos katunga sang mga kabataan nga na-enroll sa RiseAble Center sa Molo sa sulod sang isa ka tuig nga operasyon ang na-endorso na sa mga eskwelahan sa idalom sang DepEd Iloilo City Division.
Kadungan sang pagbukas sang bag-o nga pasilidad sa La Paz, ginlunsyar man ang libre nga assessment services kaangay sang Developmental Screening, Draw-a-Person Test, Autism Diagnostic Observation Schedule (ADOS), kag konsultasyon para sa mga ginikanan.
Samtang, nagpain ang Iloilo City Government sang P3.9 million nga budget para sa 2027 agud masuportahan ang padayon nga operasyon kag pagpasangkad sang RiseAble Program.
Ginpahayag pa ni Treñas nga kabahin sang programa ang pagsiguro nga mabatyagan sang mga ginikanan nga wala sila nagaisahanon sa pag-atubang sang mga kinahanglanon sang ila kabataan kag may ara sila sang suporta halin sa Iloilo City Government.
Text By: 𝐁𝐨𝐦𝐛𝐨 𝐂𝐲𝐫𝐞𝐧𝐞 𝐀. 𝐍𝐚𝐬𝐢𝐬
