Yara na sa kustodiya sang kapulisan ang suspek nga nagpatay sa 89-anyos nga babaye sa sulod sang iya mismo balay sa Ledesco Village, Brgy. Tabuc Suba, La Paz, Iloilo City.
Ini amo si Jerry Monahan Lima alias “Pablo”, residente sang Brgy. Najus-an, Mambusao, Capiz apang temporaryo nga nagapuyo sa Brgy. Guihaman, Leganes kag anay trabahante sang biktima.
Nadakpan si Lima sa entrapment operation sang Iloilo City Police Station – City Intelligence Unit sa Oton Plaza kahapon sang aga.
Natigayon ang operasyon matapos nga nagpakig-angot sa pulis ang chatmate ni Lima matapos nahibaluan sini nga involved sa krimen ang iya ka-istorya.
Base sa pulis, nagkooperar sa ila ang chatmate ni Lima nga padayunon lang anay ang ila nga istoryahanay samtang nga ginaplano man sang awtoridad kun paano makapatigayon sang transaksyon sa suspek agud nga madakpan ini kag mapasabat sa iya nga krimen nga nahimo.
Sa entrapment operation, na-recover kay Lima ang 38 revolver kag granada. Nagdinalagan pa ang mga pulis dala ang suspek sang nakit-an nila ang granada nga nakaputos sa eco bag nga nasulod pa gid sa bag nga itom.
Matandaan nga base sa imbestigasyon sang awtoridad, Mayo 24 sang aga sang nagkadto ang suspek sa balay sang tigulang nga babaye kun sa diin mismo ang biktima ang nagpasulod sa iya bangud kilala niya ini.
Isahanon ang senior citizen sa ila balay sa adlaw sang krimen bangud nga nag-day off ang iya nga kabulig. Samtang, nagatrabaho naman sa luwas sang pungsod ang duha sini ka bata kag nagtaliwan naman ang iya nga bana.
Alas-11 na sang gabi sang Mayo 24 natukiban ang natabo sa biktima paagi sa pag-check sang bata sini sa closed circuit television footage.
Nagagwa sa imbestigasyon sang Iloilo City Police Station 2 nga ginkuga, ginguyod, kag ginlasak-lasak sang suspek ang biktima.
Nahibaluan nga bag-o lang nakagwa sa presohan ang suspek sa kaso nga illegal gambling sang natabo ang pagpatay sini sa tigulang.#
