Gintawag sang secretary general sang Bagong Alyansang Makabayan (BAYAN) Panay si Presidente Ferdinand Marcos Jr. nga sipsip kag padayaw bangud sa ginahimo nga pagtago sa mga street vendors kag pigado nga komunidad sa Manila kasunod sang paghiwat sang Association of Southeast Asian Nations (ASEAN) Summit 2026 sa Pilipinas.

Sa interview sang Bombo Radyo kay Elmer Forro, iya ginpahayag nga ang pagpugong kag pag-aresto sang kapulisan sa mga nagprotesta sa Manila ang ginahimo agud matago ang pagpamatuk sang mga Pilipino sa pag-abot ni United States President Donald Trump sa pungsod.

Ini bangud suno kay Forro, tuyo sang gobyerno ipakita kay Trump ang impresyon nga suportado sang mga Pilipino ang pagbisita sini sa Pilipinas.

Ginpakamalaot man sang grupo ang pagtago sang gobyerno sa matuod nga sitwasyon sang pungsod, lakip na ang mga sidewalk vendors kag pigado nga mga komunidad agud nga magpadayaw-dayaw nga kaangay maayo ang siwatsyon sang mga Pilipino kag indi makita sang mga dumuluong ang kabudlayan nga ginaatubang sang mga ini.

Ginakwestyon man ni Forro ang daku nga kantidad sang pondo nga ginpain para sa nasambit nga summit nga nagalab-ot sa masobra P22.9 bilyon.

Ginpunto niya nga mas dapat unahon sang gobyerno ang paghatag sang nagakaigo nga pondo sa mga ospital kag pagsolbar sa problema sa sistema sang panglawas, bangud madamo sang mga pasyente ang naga-antos sang kakulangan nga serbisyo kag wala makabaton sang nagakaigo nga mga benepisyo.

Gintawag man ni Forro nga tuta sang Estados Unidos si Marcos matapos nga kaangay mas gina-una pa sini ang magpa-impress kay Trump kag magpakita sang maayo nga imahe sa iban pa nga mga lider sang nagkalain-lain nga pungsod, imbes nga unahon ang interes kag kaayuhan sang mga Pilipino.

Dugang pa sini nga wala nagakaangay nga abi-abihon si Trump, nga iya gintawag nga war criminal kag plunderer, bangud suno sa iya, mahimo maghatag sang negatibo nga epekto sa interes sang mga pumuluyo ang mga polisiya kag tikang sini.