Ginalantaw pa sang Iloilo City Government kon liwat nga magapatukod sang cooling stations bangud sa nagataas nga heat index sa siyudad.
Sa interview sang Bombo Radyo kay Engineer Neil Ravena, head sang General Services Office (GSO), iya ginpahayag nga padayon nila nga gina-monitor ang consistency sang heat index antes magdesisyon sa liwat nga pag-install sang cooling stations.
Suno sa iya, may mga adlaw nga nagalab-ot sa ‘very high index’ ang syudad nga nagresulta man sa pag-suspend sang face-to-face classes sa pila ka eskwelahan.
Apang, pahayag niya, naganubo man kun kaisa sa 32°C tubtob 33°C ang heat index kag wala pa sang rekord sang padayon nga pagtaas sini sa sulod sang duha ka semana, agud mangin basehan sa pagpatukod liwat sang cooling hubs.
Ginpahayag man ni Ravena nga mahimo buksan ang isa ka cooling hub sa General Luna kon makita nga kinahanglan gid ini.
Dugang pa sini, magadepende gihapon sa resulta sang monitoring ang pag-install sang mga cooling stations sa syudad, ilabi na nagapadulong naman ang Amihan ukon mabugnaw nga hangin sa bulan sang Disyembre.














