Ginpasiguro sang Western Visayas Transport Cooperative nga wala sang kakulangan sa ila mga units sa terminal bangod may yara sila sang mga driver kag konduktor nga naka-standby kag handa magbyahe kun magdamo man ang mga pasahero.
Sa interview sang Bombo Radyo kay Raymundo “Boyet” Parcon, chairman sang WVTC, iya ginpahayag nga gina-monitor nila sang maayo ang ila operasyon kag gina-activate ang mga dispatcher agud masiguro nga may mga units nga madasig nga mapalarga kun magdamo man ang pasahero, ilabi na kun rush hour.
Suno sa iya, indi dapat matingala ang publiko kun magamay ang naga-operate nga mga bus sa dalanon bangud wala sila nagapatigayon sang full operation sa sini nga semana tungod man sa nagnubo nga kadamuon sang mga pasahero.
Dugang pa ni Parcon, isa sa mga rason sini amo ang pagsuspende sang klase sa pila ka eskwelahan bangod sa mataas nga heat index.
