Tugutan sang mga otoridad ang temporaryo nga indi pagpasuksok sang visibility vest sang mga traffic personnel sa Iloilo City bilang isa sa mga tikang agud maproteksyunan sila batok sa epekto sang mataas nga heat index.
Sa interview sang Bombo Radyo kay Iloilo City Public Order and Safety Management Office (POSMO) Head Ret. PCol. Uldarico Garbanzos, iya ginpahayag nga nagpatigayon sila sang conference agud madiskusyunan ang mga posible nga kabudlayan nga maatubang sang mga traffic personnel bangud sa ginalauman nga El Niño phenomenon, lakip na ang pagsuksok sang visibility vest.
Suno sa iya, ginahatagan man nila sang importansya ang ikaayong lawas sang mga traffic personnel paagi sa paghatag sang vitamins kag regular nga pagpadala sang tubig samtang nagaserbisyo ang mga ini sa mga dalanon.
Ginapahanumdom man sang POSMO ang mga personnel nga unahon ang ila ikaayong lawas kag likawan ang sobra nga pag-expose sa mainit nga panahon.
Dugang pa ni Garbanzos, ginapangabay man ang mga pumuluyo nga hatagan sang konsiderasyon ang sitwasyon sang mga traffic personnel kun indi nila ini makita sa mga dalanon bangud nagalikaw man ang mga ini sa sobra nga kainit.
