Hugot naman nga ginpanginwala sang Philippine National Police (PNP) ang nagalapta nga impormasyon nga may yara sang gin-alegar shoot-to-kill order batok kay Senador Ronald “Bato” dela Rosa.
Suno kay Police Colonel Allen Rae Co, gin-athag niya nga wala sang kasubong nga mando ang ginpagwa sang ila hanay.
Pagpaathag pa niya, ang anuman nga operasyon may kaangtanan sa Dela Rosa ang pagahimuon suno sa kasuguan kag nagaluntad nga legal nga mga proseso.
Dugang pa ni Co, ginapahanumdom sang PNP ang publiko nga mangin kritikal sa ginapalapta nga impormasyon kag siguraduhon nga naghalin ini sa opisyal kag masaligan nga sources.
Matandaan nga may yara sang arrest warrant nga gin-isyu ang International Criminal Court ukon ICC batok kay Dela Rosa bilang indirect co-perpetrator sa crimes against humanity nga may kaangtanan sa mga pagpamatay kadungan sang kampanya kontra droga sa idalum sang administrasyon ni former President Rodrigo Duterte.
Matandaan man nga gin-anunsyo ni Department of the Interior and Local Government (DILG) Secretary Jonvic Remulla nga may ₱50-million nga patong sa ulo ni Sen. Dela Rosa.
