Mahimo na nga magdeklarar sang class suspension ang pampubliko kag pribado nga mga eskwelahan sa idalom Executive Order No. 130 nga ginpirmahan ni President Ferdinand Marcos Jr.
Kabahin man diri ang desisyon sang eskwelahan nga magpadayun sang klase apisar sang class suspension nga ginmando sang Local Government Unit, apang nagakinahanglan anay sang safety assessment kag kasugtanan halin sa concerned local chief executive kaangay sang alkalde.
Base man sa EO, mapatuman ini sa tion nga may ara sang documented safety threats ukon kondisyon nga makaapekto sa mga estudyante kag school personnel sa koordinasyon man sang LGU.
Sa tion nga masuspende ang in-person classes, magapadayun ang pagtuon sang mga estudyante pinaagi sa learning continuity measures.
Nahibaluan nga isa ini sa mga ginrekomendar sang The Second Congressional Commission on Education ukon EDCOM 2 para sa mas risk-informed kag locally responsive nga pagresponde sa mga eskwelahan sa tion sang emerhensya ukon indi mayo nga sitwasyon.
