Ginatinguhaan sang General Services Office (GSO) nga mangin mapuslanon ang biodegradable waste nga nakolekta sa syudad sang Iloilo kadungan sang tigkalalag paagi sa vermicomposting.
Sa sini nga proseso, gina-recycle ang biodegradable waste agud mahimo nga valuable organic fertilizer sa baylo nga ihal-id lang diretso sa landfill.
Kun may mahimo na nga compost, makabulig ini sa pag-suplay sa kinahanglanon sang gardeners, vegetable farmers, home gardeners, kag iban pa nga urban agriculture initiatives.
Sa interview sang Bombo Radyo kay Engineer Neil Ravena, head sang General Services Office (GSO), iya ginpahayag nga gina-separar nila ang madunot kag indi madunot nga mga basura para sa sini nga proseso.
Nauna na nga ginpahayag nga ang nagapanguna sa ila nakolekta sa tinalikdan nga Pista Minatay amo ang organic waste ukon ang mga basura halin sa baligya nga mga bulak.
Pahayag ni Ravena, posible nga magdalagan sa 20 tonelada ang makolekta nga basura sa ginsaulog nga All Saints’ Day kag All Souls’ Day.
Ginklaro sini nga wala pa ini nagalakip sang basura nga halin sa dalagku nga patyo bangud hulaton pa nga maglayong ukon malaya ang mga bulak nga ginpanghalad sang mga bisita sa ila nga mga minatay.
Magluwas diri suno kay Ravena, isa man sa ila nga i-assess amo kun ano ka-significant ukon ano ang kadamuon sang non-biodegradable materials kaangay sang mga Styrofoam, agud nga makahimo man sang estratehiya agud indi ini magkadto sa tubig ukon sa landfill.
Naapresyar man sang GSO nga nagsunod gid ang mga pumuluyo nga tipunon ang ila basura sa collection points rason nga na-manage kag na-monitor sang maayo kun ano ang kadamuon sang basura.
Kabilugan nga 345 personnel ang gin-deploy sang GSO para sa tigkalalag nga ginalakipan sang drivers sa truck, helpers, kag street sweepers.
Una naman nga ginpanawagan sang Iloilo City Government ang “Clean As You Go” (CLAYGO) policy nga amo ang naga-require sa mga nagaduaw sa patyo nga ihaboy ang ila basura sa husto nga area ukon sa designated collection points.#
