Nagapanguna ang organic waste sa mga nakolekta sang General Services Office (GSO) subong nga tigkalalag.
Sa interview sang Bombo Radyo kay Engineer Neil Ravena, head sang GSO, iya ginpahayag nga kalabanan sini ang nakuha sa flower vendors nga nanghimos na sang ila nga mga baligya.
Nahibaluan nga may lima lang ka mga lokasyon nga designated para sa flower vending sa syudad kadungan sang Pista Minatay nga amo ang Jaro Plaza, Molo Plaza, Mandurriao Plaza, Arevalo Plaza, kag Iznart Street sa City Proper.
Suno kay Ravena, nagdugang sila sang duha ka pa mga truck para sa koleksyon sang basura, indi lamang sa ginabaligyaan sang bulak, kundi pati sa mga patyo nga ginapanag-iyahan sang syudad nga nahamtang sa Tanza sa City Proper; Jereos sa La Paz; kag amo man sa Quintin Salas sa Jaro.
Dugang sang opisina, may inisyal na nga apat ka tonelada sang basura nga nakolekta halin kahapon tubtub subong nga udto, apang nagapadayon pa ang pagtipon sini.
Ginpahayag man ni Ravena nga wala sila sang nabaton nga concerns kaangot sa portalets nga ginpahamtang sa mga patyo kadungan sang pagdugok sang mga bisita.
Kabilugan nga 345 personnel ang gin-deploy sang GSO para sa tigkalalag nga ginalakipan sang drivers sa truck, helpers, kag street sweepers.
Una naman nga ginpanawagan sang Iloilo City Government ang “Clean As You Go” (CLAYGO) policy nga amo ang naga-require sa mga nagaduaw sa patyo nga ihaboy ang ila basura sa husto nga area ukon sa designated collection points.#
