Isa ka matahum nga okasyon ang All Saints’ Day kag All Souls’ Day suno sa Simbahang Katolika, bangud nagahatag ini sang kahigayunan sa mga tumuluo nga dumdumon ang mga santos kag pangamuyuan ang mga kalag sang ila mga pinalangga nga nataliwan.
Sa interview sang Bombo Radyo kay Rev. Fr. Lester Villa, chief exorcist sang Ministry of Exorcism of the Archdiocese of Jaro, iya ginpahayag nga ang All Saints’ Day nga ginasaulog kada Nobyembre 1, amo ang pagdumdum sa tanan nga mga santos, samtang ang All Souls’ Day sa Nobyembre 2, ang para naman sa pagpangamuyo sa mga kalag nga napatay.
Suno kay Fr. Villa, mahimo man ang mga tawo nga mangayo sang bulig sa mga santos kag sa ila mga pinalangga nga yara na sa langit para sa grasya kag proteksyon paagi sa direkta nga pagpangayo sang mga ini sa Dios.
Ginpaathag man ni Fr. Villa nga ang tatlo ka bahin sang Simbahan amo ang Triumphant Church, nga amo ang mga santos sa langit; ang Suffering Church, nga amo ang mga kalag sa purgatoryo; kag ang Militant Church, nga amo ang mga tumuluo nga nagakabuhi pa sa kalibutan kag nagapadayon sa ila pagtuo sa Dios.
Pahayag niya, nagabuligay ang tatlo ka bahin paagi sa pagpangamuyo kun sa diin ang mga tumuluo sa kalibutan, nagapangamuyo para sa mga kalag sa purgatoryo, samtang ang mga santos sa langit nagapangayo naman sang grasya sa Dios para sa mga tawo sa kalibutan.
Dugang pa ni Fr. Villa, ang All Saints’ Day kag All Souls’ Day ang nagapahanumdom sa mga tawo nga kita tanan iya sang Dios kag magaabot ang tion nga magabalik kita sa Iya agud makaangkon sang kabuhi nga wala sang katapusan sa langit.
