Wala sang prohibition ukon wala ginabawalan ang mga public transportation nga magbiyahe sa tion sang pista minatay basta kumpleto ang mga papeles kag lisensya sang mga drivers kag ila nga mga salakyan.
Sa interview sang Bombo Radyo kay Atty. Joscet Abellar, spokesperson sang Land Transportation Franchising and Regulatory Board (LTFRB), iya ginpahayag nga ginalauman sang LTFRB ang pagdamo sang mga pasahero sa adlaw kag pagkatapos sang pista minatay rason nga mahimo maka-request ang mga kooperatiba nga may kulangan sang units sang special permit agud nga makabyahe sa iban nga ruta nga nagakinahanglan sang dugang nga salakyan.
Suno kay Atty. Abellar, epektibo ang special permit halin Oktubre 28 tubtob Nobyembre 6 para sa mga units nga gin-aprubahan sang LTFRB.
Pahayag niya, lakip sa mga kinahanglanon sa pagkuha sang nasambit nga permit amo ang Official Receipt ukon Certificate of Registration, personal passenger accident insurance, kag board resolution naman para sa mga kooperatiba.
Apang, ginpahayag niya nga indi pwede magsaylo sang ruta ang masobra 50% sang mga units sang isa ka kooperatiba nga nagabiyahe sa ila orihinal nga ruta.
Kadungan sang pagkuha sang permit, iga-evaluate man sang LTFRB kon may yara gid sang kakulangan sang salakyan sa ruta nga pagasayluhan.
Maga-deploy man ang LTFRB sang mga personnel nga magalibot halin sa mga dalanon agud bantayan ang operasyon sang mga public transportation.
Ginpaandaman man ni Atty. Abellar ang mga drivers nga indi mag-overloading kag siguraduhon nga maayo ang kondisyon sang ila mga salakyan agud nga malikawan ang mga insidente sa dalanon, amo man ang pagpaandam sa mga passenger assistance officers nga magbalon sang malaba nga pasensya sa pagserbisyo sa publiko.
